Monthly Archives: June 2015

احكي عربي

المشهد الاول:

بتركب بالطيارة، الطيران المحلي مش الاجنبي (مع انهم أغلى) على أساس تدعم البلد وتخلي الشركة تدعم اقتصاد البلد وتشغل العالم معها، مش موضوعنا، المضيفة بتسألك شو بتحب تشرب طبعا بالانجليزي، انت زهقان اللغة وحابب تحكي عربي بترد عليها بالعربي، طبعا بتفهم عليك لانها عربية بس بترجع مرة تانية تحكي معك انجليزي (ما بعرف ليش).. برجع بحكي عربي بترجع تحكي انجليزي (يا أنا يا انت) طيب ما احنا بنحكي نفس اللغة شو المشكلة لو حكيتي عربي والا عيب…

المشهد التاني:

بتكون في احد المجتماعت التجارية، الام ماشية وابنها الصغير تركها وراح، بتنادي عليه… ماما come here، مش قلتلك انك ما تروح بعيد! او بتخبط بحد ماشي او حد بيخبط فيك بيحكلك Sorry؟! والله في كلمة بالعربي اسمها أسف!!! او بتناوله او بتناولها شي بتحكيلك Thank you! طيب مالها شكرا…

المشهد الثالث:

بتكون فاتح الفيسبوك بروح بطلعك صاحبك وبرسالة وبكتبلك (rhd3as sads5 dads9) وبعدها ابتسامة؟؟؟ طبعا مخي ببطل يجمع شو هاد بالزبط بقعد افك الشفرة! (اه انا قاصدكم انتوا اللي بتكتبولي هيك) بتحكيله او بتحكيلها فيك تكتب عربي، بقلك لا هاي اسرع..مش فاهم كيف اسرع كابس الكبسة سواء حرف عربي او لاتيني… المهم بدك تكتب بأحرف لاتيني بتكب لغة افهمها يا انجليزي يا فرنسي غير هيك… غيِّر للعربي.

المشهد الرابع:

بتكون واقف في المطبخ الصغير اللي في المكتب بدك تشرب ماي، بتمر عليك زمليتك بقسم اللغات، بتتعرف عليك وبتعرف انك بتحكي عربي… بتصير تهلل وتزغد (مجازيا) بتقعد ساعة تتغزل في اللغة العربية وبجمالها وقواعدها واشتقاقاتها!! ونياللي لان بعرفها.. شو ما احلى الشعر فيها… الخ

الشي الوحيد اللي بيخطر على بالك وانت بتبسم وبتحكي لحالك… يا ريت قومي يعلمون….

ملاحظه: مش معنا هاد الحكي اني ملاك ما بعمل شغلات وما بكتب بلغات تانية! لما بدي اكتب شي بلغة تانية بكون موجه الموضوع للكل مش بس لمجتمعنا… هون كلهم ١٦ مليون واحد في العالم وكل شي عندهم معمول بلغتهم حتى اجهزتهم الخلوية بتكون بلغتهم… ما صاروا متخلفين ولا ناقصهم شي بالعكس من دول العالم الاول!!