شو تعلمت من الركض؟

كمان تقريبا عشر ايام بصير لي عايش بهولندا خمس سنين، هالخمس سنين ضافوا كتير شغلات الي وفتحوا عيوني على ثقافات وعادات كتيرة منها المنيح ومنها المش منيح (طبعا برأي). أول ما وصلت على هولندا لفت نظري شغلات كتيرة منها  قديش الناس بتطلع تركض في النهار او في الليل كبار او صغار في السن ما في عمر معين.  وكنت مرات اوقف على الشباك والدنيا تكون مطر واشوف واحد او واحدة بركض تحت المطر، احكي لنفسي شو صاير بالدنيا عشان اطلع اركض تحت المطر؟ يعني لو وقفت يوم شو راح يصير؟ ما راح أموت؟ حطيت محكمة وحاكمت هاي الناس.

من شهرين قررت اطلع اركض والتزمت اني كل اسبوع اركض 3 مرات لنص ساعة. طبعا شعور حلو كتير خصوصا بعد تعب يوم أو تبدأ فيه يومك. إمبارح كانت الدنيا مطر والثلاثاء احد الايام اللي بطلع أركض فيها، روحت على البيت لبست اواعي الركض وطلعت أركض تحت المطر. وأنا بركض اتزكرت حالي وأنا بحكي عن الناس اللي بتركض تحت المطر “مجانين” هلا انا صرت مجنون زيهم. فهمت ليش بركضوا بغض النظر كيف كان الجو. والشعور وانت بتركض تحت المطر أجمل بكتير من غير مطر.

عرفت انه مرات بنعمل محاكمة لغيرنا وبنحاكمهم على شي بيعملوا احنا مش متعودين نعمله وبس نكون في مكانهم وبنفس الظروف احتمال نعمل نفس الشي. اتعلمت انه مش لازم أحاكم حد بغض النظر بشو مختلفين وعشان اقدر افهمه لازم اكون في مكانه واحط حالي بنفس الظروف اللي هو فيها قبل ما اصدر عليه حكمي.

Leave a Reply

Your email address will not be published. Required fields are marked *